中山八路隱世小店，竟吃出傳統的「廣州味」

作為廣州人

喺廣州，有一種麵食一直令我哋感到驕傲

佢用古老嘅壓面方式，傳統嘅手藝製作而成

做法一代流傳一代，一直沿用至今

而且一直得到廣州人嘅支持與喜愛

恩，佢就係：

【竹升面】

而你又知不知道竹升面點解叫竹升面呢？

竹升面

竹升面係廣東省漢族傳統麵食，廣東人因「竿」音不吉利而改稱「升」。竹升面用傳統的方法搓面、和面，用竹升（大茅竹竿）壓打出來的麵條、雲吞皮的一類麵食。

因為心念念想食一碗久違嘅傳統竹升面，搜索一番后，簡簡單單嘅「懷舊」兩個字便牽引我嚟到呢度。

懷舊竹升面- 慶雲居

在車水馬龍的中山八路后，一個舊式居民小區裡面，匿藏住一間傳統手工竹升麵店。因為位置隱秘，若唔係地膽或者本地熟人，一般都穩唔到呢間店甚至唔知有店鋪嘅存在。

店鋪無進行廣告宣傳，單靠街坊們一個個口口相傳。經營至今，小小嘅店鋪依然可以吸引到好多外來人為咗一碗傳統竹升面慕名而來（而小編就係其中一個）。

作為一個探店者，一個外來人，小編係搵店嘅途中試過迷路，要一邊靠導航，一邊問路人，兜兜轉轉先搵到呢間竹升麵店。

俗語講得好，好東西都係隱藏住嘅，只有有心人先發掘到，並嘗到當中嘅獨特味道。

進店后第一眼見到三個大字 — 店鋪嘅名字「慶雲居」用老式牌匾掛在店鋪內正中間位置。

而老闆見到我哋之後，除咗歡迎之外臉上略顯驚訝，好奇問我哋從邊度嚟，話平時未見過我哋。

得知我哋係慕名而來后，熱情好客嘅老闆好似在歡迎新朋友咁，同我哋推薦各種好食嘅。

意料之內，店內環境相對簡陋，並沒有精緻嘅裝修，只有3-4張長台，一目了然。

開放式嘅玻璃窗口，客人可以見到廚房內的一景一物。師傅就係喺呢度每日壓面做面，日復一日，從未停歇。可惜當日無幸見到師傅做面、壓面過程。

/ 店鋪內所有東西都簡單樸素 /

/ 當然吸引我嘅並唔係環境，而係出品 /

[ 雲吞面 ]

¥8

店鋪招牌係雲吞面，雖然依家物價飛漲，但係因為店鋪專做附近街坊生意，念舊情之下，一碗足料雲吞面依然只售8蚊，實屬良心出品。

鎮店之寶當屬呢個【竹升面】，既然叫得懷舊竹升面，老闆話店內所售賣嘅面全部都係全手工用傳統手法製作而成，絕無虛假。

麵條透明，呈金黃色。可見師傅嘅工藝非同一般。同行小夥伴都大讚好食！

雲吞雖然係細細一粒，但係粒粒飽滿，真材實料，而且十分爽口彈牙，配上鮮湯嫩還不膩。一啖一粒雲吞，「根本停不下來」。

上第一碗面時，老闆就叫我哋趁熱食，老闆性格好好，好健談，而且好貼心，從進店到離店我哋都有講有笑。或者呢D就係所謂老廣情懷。

在交談中發現，老闆對食物要求嚴謹，因為做嘅多數都係街坊生意，老朋友。每一碗面都保證安全健康，為咗唔影響面嘅質量，老闆唔支持送外賣，想食麵就只好親自到店，老闆親自做。

店內呢碗人力竹竿「升」面，吃得出簡單真切嘅舊日情懷味道。

注 意

「 秘制霸王辣醬，請酌情享用 」

除咗竹升面係鎮店之寶之外，不得不提呢個老闆特製嘅霸王辣醬，只因佢受過好多客人佩服！

一個同行「重辣「級別嘅小夥伴大無畏咁挑戰咗小半勺，一向食開重口味嘅佢話：「真係好辣！！！ 不過少少落口係舒服嘅，多少少都唔建議大家食啦。」

我哋問老闆點解要整到咁辣 ？老闆笑住講，「整辣D，大家食少D，我就可以偷下懶唔洗成日整啦。」 係wor~ 又幾有道理哈哈

食得辣嘅朋友如果嚟到強烈建議一試老闆自豪嘅自製辣醬！

[ 牛腩面 ]

¥10

部分人認為牛腩應該配濃湯先會更加入味，但係呢間店仍然選擇用清湯配底，只因老闆對佢嘅用料十分自豪。

食材精選，調味得當，就算係清湯都可以有鮮甜美味嘅效果，而正正因為咁樣所以情懷小店更深得人心。

牛腩肥瘦相間且口感非常特別，唔會太軟，嚼勁啱啱好~同埋牛腩吸收咗湯底嘅味道后更加滋味十足！

[ 炸醬麵 ]

¥14

呢款炸醬麵係老闆推薦嘅，麵條拌上油而不膩、料味十足的炸醬，一碗就食飽！

將誘人嘅炸醬末充分攪拌在竹升面上，再送入口，舌頭干香乾香。辣香麻全完都呈現係口腔中，一股酥麻感在舌邊徘徊，越食越香。

雖然炸醬麵係微辣，但對於唔食辣嘅我嚟講，都有DD辣~ 老闆同樣好好咁教我點食唔會咁辣，又幫我換一碗味道偏淡嘅湯沖談辣味。

/ 的確 /

/ 懷舊竹升面用心在做情懷生意 /

/ 更一直用心對每一位進店嘅客人 /

地 址

中山八路周門街166號中興苑小區中庭406鋪

路線指引

大眾點評上嘅導航都精準，跟住點評上的導航走，最後位置會將我哋帶到 「廣州設計港」附近

一顆大大嘅榕樹頭標誌，見到之後直入呢條巷一直行直到見到公園，而竹升麵店就在公園一旁。

依家好多食肆都商業化，拚命追求利益。而唯有呢D小店係親民，係用心，係難能可貴。

到現時，我仲懷念碗面嘅味道，記得老闆嘅笑容，嗰只溫純嘅狗狗，仲有離店時老闆親切嗰句：「得閑再嚟啦。」 「恩，一定再嚟！」

唔知大家身邊有無屬於廣州味道嘅懷舊小店呢？

歡迎留言，我想一一去試下~