吳語三門話《荷塘月色》

作者：晨風

就在前兩天，我們突然發現了一個很有意思的公眾號，這個公眾號會用吳語三門話朗讀一些著名的文學作品，也會發布現在少見的三門童謠。

「隨著普通話的普及，本地人的下一代會說吳語本地話的越來越少。我的不少同學、朋友，兩夫妻都是當地人，彼此溝通、或與祖輩溝通都用本地話，但一與孩子溝通就立即切換成普通話。難道本地話就不如普通話嗎？本地話也有其魅力......我希望在工作之餘做這樣一件事情——記錄方言土話，守望吳語鄉音。傳承歷史文化，留住鄉愁記憶。」

有為也將陸續採集關於三門風俗和三門的方言小品，與大家分享。

傳承歷史文化，記憶吾鄉吾土。

今日與大家分享三門話朗讀朱自清《荷塘月色》：

三門話翻譯《荷塘月色》：

「

箇兩日心事重重。晚頭夜滿月，坐道地頭乘涼時節，驀丁頭箇一記忖著，日加日走來過去個荷塘，晚頭望來是不是不樣點？月亮慢慢似爬高爻，牆頭外馬路得小人頑頑個聲響也聽不著爻。老孺在屋裡畀兒搿牢定搭搭，嘴巴帶得輕輕似嚶嚶。我偷來畔披件長衫，門帶把得便出去爻。

荷塘岸腳個煤渣小路彎彎曲曲。條路死冷清，日得也無人走猛，夜得便越發斷人種爻。荷塘頭圈樹出滿爻，樹蕻密密稠稠。路橫邊寔兩株楊柳對幾株名字也謳不出個樹。無月亮個夜得，條路陰森森，有點㦜人相。晚頭且蠻好，講轉來箇月光也還只淡淡個。

路得便只我獨個，手背得蕩蕩。箇一片世界裝來寔我記樣，我也恰對超出自我，得各個世界爻樣。我中意鬧熱，也中意冷靜。中意對人家住解得，也中意獨個人。對晚頭樣，獨個人在箇白刮刮個月亮下，何物都好忖，何物也都好不去忖，自由得猛。日得刻板要做個事干、刻板要講個說話，且都好甮恤渠。箇便是獨個人個妙處，我且要好好個享受享受箇無邊無限個荷香月色。

彎彎曲曲個荷塘上頭，滿眼望去都寔密密稠稠個荷花葉。荷花梗望水得出出來高猛高，對亭亭玉立個跳舞小姐個裙樣。層加層個荷花葉中央心，兩朵白花朗花花嵌得，有裊裊動開得，也有花蕊斜吤得，望來倒霉相樣。恰對粒加粒夜明珠樣，亦像碧空里向個星星，亦像澡對洗出來個美人。小風拂面，絲加絲清香送來，便對遠猛遠高樓上頭縹緲個歌聲樣。箇時節葉對花也輕輕似一記抖，觸電樣，一剎時工夫便傳得荷塘吤頭去爻。荷花葉本來是肩搭肩敀來緊猛緊，箇一記裝，便恰對一道碧綠個水波樣。葉下頭寔不聲不響個流水，遮牢定，望不著猛。荷花葉倒轉越望越有味道。

月光對流水樣，輕輕似瀉荷塘上頭。薄菲菲個青霧浮在荷塘里向。葉對花恰對在牛奶里向洗過樣，亦恰對用輕紗籠得個夢樣。雖然講寔滿月，天得還一層淡雲在得，為之望來不亮猛。我忖忖還算箇子頂好——酣睡固不可少，小睡也別有風味。月亮隔樹照落來，墈頭上向個矮樹，畀箇搭加搭黑黜黜個影留落來，不動動望來對鬼樣。楊柳樹彎曲個樹影，像畫箇荷花葉得樣。塘里向月色不介調勻，但是光、影搭配蠻協調，便對小提琴解出來個名曲樣。

塘個頭圈，遠遠近近、高高低低都寔樹，算楊柳頂多，畀只塘圈加圈圍牢定，只在小路腳得剩兩段空當，不識是不是特特意為月亮留得。樹色全部黑黜黜，驀丁頭一眼望去對煙霧樣。便算箇子，楊柳個風姿也會分得出。樹梢腦頭上向望過去，是遠猛遠個一垛山，隱隱約約，便只一隻輪廓。樹蕻里向還有一兩點路燈個光漏出來，無精打采，懵懂懂個眼樣。箇時節頂鬧熱個，寔樹得箇沙甲鈴對塘得箇蝦蟆個聲音。當然，箇物都寔人家個鬧熱，我何物也沒有。

箇一記忖著摘蓮蓬個事干。摘蓮蓬寔江南箇舊俗，老早便有爻，六朝時節頂興。詩歌里向也有記得。摘蓮蓬個小大娘，小船劃劃，小歌唱唱。有人摘，有人望，場面鬧熱，後生大娘還趁箇時節談情說愛。梁元帝《採蓮賦》里向講來蠻好：

於是妖童媛女，蕩舟心許；鷁首徐回，兼傳羽杯；欋將移而藻掛，船欲動而萍開。爾其纖腰束素，遷延顧步；夏始春余，葉嫩花初，恐沾裳而淺笑，畏傾船而斂裾。

可見當時個場面，確實是蠻有意思。且我伲老早也無法消受爻。

亦忖著《西洲曲》里向個話：

採蓮南塘秋，蓮花過人頭；低頭弄蓮子，蓮子清如水。晚頭夜得講有人摘蓮蓬，箇得個荷花也算講過人頭爻。只不過連水影也望不著，寔無較用個。講來講去，還寔江南好。

扣箇子忖，頭一記竅，幾時得門口頭爻。輕輕個攮進去，何物聲響也無，老孺困去一界爻。

」

記錄方言土話，守望吳語鄉音。

傳承歷史文化，留住鄉愁記憶。