Zi 字媒體

最近坐捷運，多咗好多細路仔同我一齊逼捷運，不過人哋系放暑假出去玩，我哋系返工搵兩餐。見到佢哋歡聲笑語，好似有把聲同我講緊，已經出嚟工作嘅人，冇資格講寒暑假。屏幕前嘅你，童年過暑假你會做咩？除咗吹風扇，食雪條，打街機，好多人都同我一樣，暑假一直等緊一個神聖嘅節目——《兒歌金曲頒獎典禮》。《兒歌金曲頒獎典禮》簡直系每個80、90后廣東人嘅童年集體回憶，暑假嘅某個星期日，我哋唔理阿媽發火，都會捱夜堅持睇完佢。依家嘅00后好幸福，活喺網路普及嘅年代，一部手機滿足消遣需求，佢哋亦從來唔缺娛樂資源，綜藝節目井噴，節目形式層出不窮，睇到悶換個台就有新節目。所以，佢哋好難理解呢檔製作一般、流程無聊、剩系扮鬼扮馬嘅cosplay頒獎典禮對於我哋嘅意義。而大部分80、90后童年最大嘅樂趣，就系追動漫。我童年嘅時候，TVB喺17:15播動畫，所以我每日一放學攞起書包就衝出課室門口，直奔屋企打開電視，一分鐘都唔願意錯過！TVB為懵懂嘅我打開咗動漫大門，唔單止配上親切嘅粵語配音，最重要嘅系，嗰啲朗朗上口嘅粵語主題曲。到後來，睇《兒歌金曲頒獎典禮》成為我每個假期嘅必備項目。《兒歌金曲頒獎典禮》始於1992年，香港小朋友投票選出當年最中意嘅兒歌，得票者前十就可以上頒獎典禮表演。而每期頒獎典禮設定一個主題，中間設計唔同情節及表演串聯起十首兒歌，最後宣布金銀銅曲得獎名單，然後唱金獎歌曲作為結尾。（最早幾屆嘅流程會有所不同）以前嘅我哋都好單純，睇住一班人唱唱跳跳，睇一晚都唔覺得無聊，甚至自己跟住跳。▲1992年《兒歌金曲頒獎典禮》，比起感人嘅畫質，只變種多啦A夢更恐怖！▲蓋世寶- 魔法小美穗 兒歌金曲頒獎典禮2000年《兒歌金曲頒獎典禮》基本系一年一屆，除咗02、03年，由於候選歌曲太多，就曾經辦過一年兩屆。回想起身，嗰時應該就系TVB兒歌嘅全盛時期，好多耳熟能詳嘅兒歌都出自嗰幾年。▲Twins - 跅跅步哈姆太郎兒歌金曲頒獎典禮2002年《兒歌金曲頒獎典禮》嘅司儀陣容基本上都系鄭丹瑞、肥姐、安德尊，有時候會加上兒童節目主持、當年香港小姐嘅冠亞軍。好多頒獎典禮都系充滿成人利益嘅遊戲，從屏幕內鬥到屏幕外，相比之下，《兒歌金曲頒獎典禮》充滿住簡單又純真嘅美好。一班平時無機會擔大旗嘅兒童節目主持及兒歌歌手成為主角，舞台上卡通公仔喺度跳舞表演，唱住日日追嘅動畫主題曲，輕鬆到好似一個課後遊園會。而每次當肥姐宣布得獎歌曲嘅一刻，我都希望系自己鍾意嘅卡通片主題曲，真系好似啲歌手嘅瘋狂fans。▲陳奕迅 - 超人主題曲兒歌金曲頒獎典禮1998當年上台領獎嘅，既有天王巨星級人物，如陳奕迅、郭富城，又有如今淡出熒幕嘅面孔，比如曾嘉莉，歐倩怡。比如當年仲系新秀嘅曾嘉莉，憑《百變小櫻》勇奪2000年至NET兒歌大獎，攞獎嘅之後一臉愕然，到咗獻唱甚至感觸落淚，咁真性情嘅女藝人真系少見。▲曾嘉莉- 百變小櫻2000年度兒歌金曲頒獎典禮以前我總系覺得《兒歌金曲頒獎典禮》會一直搞落去，等我啲仔女出世之後，我可以同佢哋一齊睇，我冇諗過佢結束得咁突然。呢場老少咸宜嘅盛事最終停步於2009年，2010年開始TVB再冇任何舉辦嘅消息，《兒歌金曲頒獎典禮》就咁默默消失於大眾視線。港式兒歌嘅沒落，其實唔系一朝一夕嘅事。畢竟新世紀以來，香港粵語歌市場衰落，新晉實力歌手屈指可數，粵語兒歌難逃唇亡齒寒，創作力劇減。加上TVB兒童節目製作改變，動畫主題曲順應民意基本上用返日文原版，只有好似《多啦A夢》咁嘅經典得以保留，TVB已經冇可能湊夠兒歌嚟搞一個頒獎典禮。曾經作為忠實觀眾嘅我哋，唯有重聽童年經典兒歌懷念以前嘅純真時光。▲就連《放學ICU》都於2015年停辦，改為新節目《Think Big 天地》屈指一數，《兒歌金曲頒獎典禮》已經停辦八年。仲記得以前細個睇頒獎典禮，可能我當時並唔識啲歌手，聽到首歌嘅旋律就喺電視機前跟住哼唱附和。若干年後，當我再次重溫兒時經典，先發現承包我童年兒歌嘅可能系啲天王天後級人馬，以前果然系細路仔唔識世界。▲連劉德華都走嚟唱《數碼暴龍》主題曲，可見當時《數碼暴龍》有幾紅！▲梅艷芳唱《IQ博士》，簡直系史上最成功嘅騙局，因為完全聽唔出！▲我就記得陳奕迅唱超人主題曲，冇諗過鋼煉嘅主題曲都系佢唱由於時間關係，我仲準備咗個TVB經典動畫主題曲畀你哋！流量黨請毫不猶豫點擊，一齊緬懷我哋共同嘅童年！各位自己友，你童年摯愛兒歌系邊首？邊個兒歌原唱系你最估佢唔到？若被傷害夠，就用一對手痛快地↓掃一掃↓素材出自維基百科、Sizz、新假期周刊羊城網負責整理編輯