Zi 字媒體

今日搭捷運，偷聽到兩位太太傾八卦，其中一位太太話：我家婆初一十五就拜神，個仔畀佢湊，我真系驚畀佢帶壞......雖然我唔拜神，但系都想同大家傾傾「拜神」呢件事。首先同大家分享幾個故事。一、時間：2017年6月5日 地點：添仔家添媽：快啲過嚟拜神啊，後日聯考啦！添仔：有鬼用咩，拜次神不如做多兩條數學題啦！添媽：你識咩啊！你家姐嗰年拜完神，聯考考得幾好啊，高分過平時幾十分啊！添仔：唔拜！你拜埋我嗰份，我入房複習。添媽：真系唔生性！ 有怪莫怪 細路仔唔識世界...（添仔今年聯考裡面，正常發揮，被佢嘅目標大學成功錄取。）二、時間：2017年正月廿六 地點：屋企門口我：阿姨，夜麻麻去宵夜啊？鄰居阿姨：宵咩夜啊，去西樵山啊！觀音借庫去搶個頭位！我：觀音借庫靈唔靈嘎？鄰居阿姨：梗系靈啦，我年年都去！以上場景，廣州人都唔會陌生。「拜神」從古到今都系我哋嘅傳統習俗。傳統觀念強嘅，除咗逢年過節、初一十五拜神之外，早晚都會裝香。再誇張啲，仲會24小時維持香火不滅......咁樣系唔系封建迷信？喺度要同大家分享第三個故事。三、時間：2017年8月28日 地點：廣州 人物：新加坡華僑文叔、老友昌叔。文叔：廣州真系變曬樣喔！廿年冇返嚟，以前間爛鬼磚頭屋，起咗棟咁高嘅樓！昌叔：你老懵懂了，廣州依家一線城市啊，你去到新加坡梗系唔知啦！文叔：今日七月初七，點解度度都冇「乞巧市」嘎？昌叔：依家好少嘎啦，人人都過情人節，有幾多後生聽過乞巧節啊。文叔：唔系阿嘛，習俗嚟喔，新加坡成條街（唐人街）都慶祝！昌叔：挑，時代變啦，啲後生點識呢啲「老坑嘢」啊。文叔：發瘟啦你，我個孫都知，盂蘭（節）仲跟我哋去拜。.........（文叔認為「外國人」比人更加堅持傳統習俗。）的而且確，好多廣州新生代就同昌叔講嘅一樣，對呢啲「老坑嘢」一無所知，覺得索然無味。見到老一輩拜神，就認為系封建迷信、愚昧無知。甚至，仲會以「科學」嘅名義指責老一輩。拜神者當中，確實有「病態迷信」，佢哋希望通過拜神，得到神明保佑，不勞而獲，貪慾大於風俗。但對大部分人嚟講，拜神只不過系一項「固定儀式」：拍戲拍劇，開機之前都會拜神，祈求拍攝順利；店鋪開張，唔少得拜祭財神，祈求貨如輪轉；公司企業，初七開年都會簡單拜祭，祈求新一年掂過碌蔗......如此種種，雖說包含祈求，但講到底，都系一份儀式感，但求心安理得。正如中秋拜月光、年三十晚謝灶、人日「七寶羹」、中元節祭祖...除咗系嘅傳統習俗，更加系老一輩生命中唔可以缺少嘅「儀式」。呢份儀式感對我哋嚟講可能微不足道，但對老一輩嚟講，系佢哋人生嘅一大部分，亦代表住佢哋對屋企人嘅愛，因為佢哋拜神嘅時候，第一句喺心裏面默念嘅都系：保佑全家人平平安安，身體健康...呢個願望，系老一輩堅持拜神嘅最大動力！而呢個願望，往往就被人認為系「迷信」。成日認為阿媽拜神太迷信，但我哋仍然半信半疑咁喺阿媽「慫恿」之下照做，我哋咁樣算唔算迷信？我系有故事嘅 阿爆