TVB旅遊節目可以歷久不衰，全靠佢哋夠曬出位！

前排洪永城同唐詩詠嘅分手搞到滿城風雨，點知話口未完哩兩晚又見返洪永城哩個風頭躉係TVB出現。今次佢總算唔再拍戲，老老實實做返旅遊主持哩個老本行。

咦？等等先，個節目名好似唔多對路嚄？「退休地圖——介紹退休之後最適合居住嘅地方」...道理我都明，但係點解要搵洪永城？唔係應該搵四哥同修哥拍先啱咩？

話到明教你點退休，點知洪永城跳曬飛機又衝浪仲蒲吧？退休人士大大話話都60歲起跑，你咁教人退休唔怕屋企人投訴噶？

唔似亞視咁度縮，唔係梅州就汕頭，無線嘅旅遊節目下下都大手筆，珠峰朝鮮哩啲高難度動作珊姐一樣冇問題！但係旅遊節目無非就吃喝玩樂， 想出位就只可以係主持人身上搵噱頭~

最串嘴

杜如風，人稱肥風，港女標杆式人物，懶玩大洗仲串嘴，無線前幾年挖過嚟嘅主持人，嘉禾電影公司宣傳部經理杜惠東嘅女，絕對係大len把錢嘅人物。

杜如風主打日本韓國線路，節目內容唔係食就係買！一邊買仲一邊曬自己家底好屋企成千對鞋，買衫買褲幾萬蚊一件眼都唔眨仲對住鏡頭嗌「好抵」，睇到無數觀眾眼火爆！

越係俾人鬧就越有話題性，《流行東京/首爾》、《東京/關西攻略》，出完一輯又一輯。杜如風講嘢慢得嚟又一舊舊，小動作又多又誇張，鐘意瞪眼手指指，好多人都狂插要求腰斬節目，寧願無線播《哆啦A夢》好過！

最好波

《3日2夜》係一個主打72小時之內體驗熱門城市最精彩最地道嘅蒲點。哩個節目從14年開播就爆到16年開第二輯，聽起身咁正路點解會爆到咁？米又係因為主持夠「功力」咯！

每集唔同嘅城市都會有唔同嘅女主持介紹，除咗一般嘅景點遊玩，最唔少得就係大量水著戲份！浸溫泉、水上樂園，女主持嘅胸器成為收視嘅最強保證！

除咗收視狂飆之餘哩個節目仲捧起咗一大班新晉「咪神」，好似陳婉衡、朱智賢、張秀文、張曦雯、鄺潔楹等等，個個非D即E嘅噴火身材，睇到成班巴打眼眼擎擎 ！

最易釘

哩個旅遊節目真係TVB最「唔知死」嘅傑作，搵埋曬啲七老八十嘅老坑去做背包客玩自由行，連全程坐輪椅嘅曾江都夠膽搞埋。我哋作為觀眾睇嗰個仲驚過玩嗰個，無線真係唔怕旅遊節目變警訊？

四個加埋319歲嘅人瑞，除咗四哥謝賢同Joe Junior仲尚算精靈之外，有痛風嘅曾江去到邊都要坐輪椅仲要其他老坑推佢，連四哥都詐型話佢「詐病駝衰家」，而胡楓修哥就成日「唔在線」，講嘢行動都慢半拍，睇少陣都隨時瞓著。

最估唔到嘅係哩班老坑越老越好火，係節目已經成日嘈交，但係以為節目效果玩下啫！點知係宣傳嘅記者會直接開拖！四哥原本一巴星落曾江度，點知中間想勸交嘅修哥無辜中招，眼鏡都打飛埋！

場交打完之後有媒體同四哥講曾江等緊佢嘅道歉電話，串爆四哥直接一句「 等我入棺材嗰日啦！」同曾江決裂。搞到咁大單睇怕TVB都知驚唔敢再撩哩堆老人家啦！

最金句

同其他綜藝向嘅旅遊節目唔一樣，《世界零距離》係由TVB嘅新聞部製作，而主持人係由成日坐鎮6點新聞嘅方東升擔當。

本來應該係一本正經嘅旅遊資訊節目，就因為哩個睇起身「老正」又嚴肅嘅方東升係節目中不停搞爛gag狂爆金句變成一場真人棟篤笑！

一試難忘，再試投降

唧唧復唧唧，織極都唔識

我想知，但我唔想試

世界上冇免費午餐，

除非你準時上班

你話哩條係咩路，

嚴格嚟講，真係唔係路

一臉認真咁亂噏廿四，俾網友狂贊超越黎明、張繼聰，榮升新一代「金句王」，仲話佢係星爺接班人！

依家睇旅遊節目好山好水好風景已經滿足唔到我哋哩啲閹尖嘅觀眾，畢竟人窮睇咗又冇錢去，都係睇翻主持當睇真人show過癮啲！